ഉറുമ്പുകളുടെ യാത്ര

ഘട്ടം ഒന്ന്
വറുതിയുടെ വേദന നിറഞ്ഞ
ഭുമിയിലുടെ തീ പിടിച്ച
ഒരു ചങ്ങലയായി
ഉറുമ്പുകള്‍ യാത്ര പോയി
തീന്മേശയുടെ ലുബ്ധിനെ-
ക്കുറിച്ച് അവര്‍
വഴിനീളെപ്പറഞ്ഞു

ഘട്ടം രണ്ട്
കണ്ണുകള്‍ മോഷണം
പോകുന്ന ഒരു രാത്രിയില്‍
ഏതോ അണപ്പല്ലില്‍ നിന്ന്
അവര്‍ക്കൊരു
ഇറച്ചിക്കഷണം കിട്ടി
നഷ്ടപ്പെട്ട ചങ്ങാതിയുടെ
ഗന്ധം കൊണ്ട്
അതവരുടെ
വിശപ്പിനെ ചൂഴ്ന്നു

ഘട്ടം മൂന്ന്‍
ചവിട്ടടികള്‍ ഇടറാന്‍ തുടങ്ങെ
ഇറച്ചിക്കഷ്ണം അവരെയറിയിച്ചു
- വഴി
ഉറക്കം പിടിച്ച
നേതാവിന്റെ
ശരീരത്തിലൂടെയാണ് ....!